Pay rules sa Araw ng Kalayaan, Eid’l Fitr, sundin - DOLE

Date Posted: June 12th, 2018 01:47 PM

Nagpaalala na ang Department of Labor and Employment (DOLE) sa mga kumpanya sa pribadong sektor na sumunod at ipatupad ang tamang pasuweldo sa kanilang mga manggagawa kasabay ng pagdiriwang ng ika-120 Araw ng Kalayaan ng Pilipinas sa Hunyo 12, 2018, Martes, at sa Biyernes, Hunyo 15, 2018, para naman sa pagdiriwang ng Eid’l Fitr, na kapwa idineklara bilang regular holiday.

 

Alinsunod sa Proclamation No. 269 at 514 na inilabas ni Pangulong Rodrigo Duterte noong Hulyo 17, 2017 at noong Hunyo 6, 2018, nag-isyu rin si Labor Acting Secretary Ciriaco A. Lagunzad III ng Labor Advisory No. 09, series of 2018, na nagdedeklara sa mga nasabing araw bilang regular holiday.

 

Kasunod nito, nagpaalala ang labor department sa mga business establishments na sundin ang mga sumusunod na panuntunan sa pasuweldo para sa nasabing mga holiday.

 

Kapag ang empleyado ay hindi nagtrabaho, babayaran pa rin siya ng 100 porsiyento ng kanyang suweldo para sa isang araw, gayundin ng kanyang Cost of Living Allowance [(Arawang suweldo + COLA)] x 100%];

 

Kapag pumasok naman ang empleyado sa trabaho, babayaran siya ng 200 porsiyento ng kanyang suweldo para sa isang araw para sa unang walong oras ng trabaho, gayundin ng kanyang COLA [(Arawang suweldo + COLA) x 200%].

 

Kapag ang empleyado ay nagtrabaho nang lagpas sa walong oras, babayaran siya ng karagdagang 30 porsiyento ng kanyang hourly rate (Hourly rate ng arawang suweldo x 200% x 130% x bilang ng oras na tinrabaho).

 

Kapag ang empleyado ay nagtrabaho at nataon na ang mga araw na ito ay kanyang day-off o rest day, tatanggap siya ng karagdagang 30 porsiyento ng kanyang arawang sahod na 200 porsiyento [(Arawang suweldo + COLA) x 200%] + [30% (Arawang suweldo x 200%)];

 

Sakali namang mataon na day-off ng empleyado at nagtrabaho siya ng overtime, tatanggap siya ng karagdagang 30 porsiyento ng kanyang hourly rate para sa nasabing araw (Hourly rate ng arawang suweldo x 200% x 130% x 130% bilang ng oras na tinrabaho).

 

#Paul Ang

    Search Jobs
  • Phil-JobNet Logo