Nakatanggap ng tawag ang DOLE Hotline 1349 mula kina Marivic Cruz, isang Information and Technology Specialist, at Jae Capistrano, isang administrative assistant, upang iulat ang kani-kanilang kompanya dahil sa hindi pagbabayad ng overtime pay, holiday pay, at night shift differential.

Batay sa ulat mula sa DOLE Hotline 1349, matapos kunin ni Hotline Action Officer John Pili ang lahat ng kinakailangang impormasyon mula kina Cruz at Capistrano, agad nitong tinawagan ang kanilang kompanya upang ipaalam ang tamang kuwenta sa overtime pay, holiday pay, at nightshift differential.

Tinanggap ng human resource managers ng mga nasabing kompanya ang kanilang pagkakamali at kanilang inayos ang sahod nina Cruz at Capistrano para sa Oktubre 2016.

Sinabi ni Labor and Employment Secretary Silvestre H. Bello III na ang matagumpay na kuwento nina Cruz at Capistrano ay bahagi ng 15,222 na tinanggap na tawag ng DOLE Hotline 1349 mula sa mga manggagawa at employer mula nang ito ay mailunsad noong 6 Setyembre 2016.

Matapos nilang tanggapin ang tamang sahod, muling tumawag sina Cruz at Capistrano sa DOLE Hotline 1349 upang pasalamatan si Pili at ang iba pang DOLE Call Center Action Officer. “Lubos akong natutuwa at naitama ang aking sahod. Kung hindi sa pagsusumikap ni Mr. Pili, hindi malalaman ng aking ahensiya ang tamang kuwenta ng aking benepisyo,” ani Capistrano.

Samantala, sinabi ni Bello na itinatag ang DOLE Hotline 1349 para mas maraming manggagawa ang mabigyan ng serbisyo ayon sa polisiya ni Presidente Rodrigo R. Duterte na nag-aatas sa lahat ng ahensiya ng pamahalaan na palakasin ang feedback at konsultasyon sa mga mamamayan para sa mas maayos na pagbibigay serbisyo ng pamahalaan.

“Ito ang kontribusyon ng Kagawaran upang tiyakin na maayos at mabilis ang serbisyong ibinibigay ng pamahalaan sa ating manggagawa. Mas pinahuhusay at pinalalakas ng 24/7 hotline service ang pagpapaunlad ng empleo at pagtugon sa mga katanungan ukol sa paggawa,” ani Bello.

Nitong 30 Nobyembre, nakatanggap ang DOLE Hotline 1349 ng 96 percent satisfaction rate mula sa mga kliyente nito para sa serbisyo at impormasyon na kanilang nattangap mula sa Hotline Action Officer.

Ang karaniwang katanungan na natanggap ng hotline action officers ay tungkol sa tamang bayad at kuwenta ng sahod, holiday pay, minimum wage, pag-regular ng manggagawa at ‘endo’, at iba pang katanungan mula sa OFW.

Idinagdag ni Bello na ang call center ay may sapat na kinakailangang pasilidad at pinapangasiwaan ng 10 kawani ng DOLE sa bawat shift.

END/CTM/GMEArce

Like
Like Love Haha Wow Sad Angry