Nagsanib pwersa na ang Department of Labor and Employment – Overseas Workers Welfare Administration (OWWA), Department of Social Welfare and Development (DSWD) at Department of Justice (DOJ) sa pamamagitan ng Memorandum of Understanding (MOU) na pinirmahan kahapon upang bigyang proteksyon ang mga anak ng mga Overseas Filipino Workers (OFWs) na kanilang naiwan sa bansa.

“Kami ay lubos na naalarma sa mga dahilan ng naitatalang kaso ng karahasan sa mga bata, na ayon sa ilang mga pag-aaral, ang pag-alis ng bansa ng kanilang magulang ang dahilan ng pang-aabuso sa mga kabataan,” pahayag ni Bello ayon sa isang pag-aaral na isinagawa ng Council for the Welfare of Children (CWC) and United Nations Children’s Fund (UNICEF).

Dagdag pa ni Bello, ang MOU ay bahagi ng pagsisikap ng pamahalaan upang balansehin ang kagustuhan ng mga OFW na maibigay ang mga pangangailangan ng kanilang pamilya mula sa pagtatrabaho sa ibang bansa, at siguraduhin na ang kanilang mga naiwang anak ay nasa mabuting kalagayan.

Ang mga pumirma sa nasabing MOU ay sina Labor Secretary Silvestre H. Bello lll bilang OWWA Chairman of the Board of Trustees, Secretary Vitaliano N. Aguirre ll ng DOJ, at Secretary Judy M. Taguiwalo ng DSWD.

Sa ilalim ng kasunduan, ang OWWA ang mamahala sa pagpapaigting sa kampanya laban sa karahasan sa mga bata, lalo’t higit sa mga anak ng mga OFWs sa pamamagitan ng mabilis na paglilinaw ng anumang isyu patungkol sa anumang pang-aabuso.

Ang OWWA rin ang magsasagwa ng mga regular na konsultasyon at monitoring sa mga Family Welfare Officer; magbibigay ng mahalagang impormasyon sa mga sitwasyon ng mga OFWs; mamamahagi ng mga information material patungkol sa Child Abuse and Exploitation sa tulong ng OFW Family Circles (OFCs) at OFW Help Desks.

Magkakalap rin ang OWWA ng mga module sa Child Abuse and Exploitation na inihanda ng DSWD sa pagsasagawa ng mga trainings at orientations sa pamilya ng mga OFWs; at magre-report sa DSWD, DOJ ng anumang kaso ng pang-aabuso sa mga kabataan.

Ang DOJ naman ang magsasagawa ng mga imbestigasyon sa anumang kaso ng pang-aabuso at karahasan sa mga bata; ang magbibigay ng legal na tulong sa pamilya ng biktima; ang mag mo-monitor sa lagay ng mga naisampang kaso sa korte; ang magseseguro ng isang child-friendly na imbestigayong nakasaad sa DOJ-CSPC Protocol for the Management of Child Victims of Abuse, Neglect and Exploitation; ang magsasagawa ng mabilis na aksyon sa mga naisampang kaso.

Makikiisa rin ang DOJ sa mga case conference ng OWWA at sa mga programang napagkaisahan ng OWWA, DSWD, Local Government Unit, at ng Philippine Overseas Employment Administration (POEA).

Ang DSWD naman ang maghahatid ng tulong at proteksyon sa mga anak ng mga OFWs na biktima ng pang-aabuso sa tulong ng lokal na pamahalaan; ang makikipagtulungan sa iba’t ibang ahensya na kabilang sa MOU sa proseso ng pagsasampa ng kaso laban sa karahasan; ang makikibahagi sa pinaigting na kampanya laban sa Child Abuse and Exploitation ng OWWA, DOLE, LGU, DOJ, at AFI; maghahatid ng anumang uri ng tulong ayon sa kanilang mandato sa ilalim ng Executive Order No. 221 at Executive Order No. 1.

Ang DSWD rin ang mangunguna sa pagtulong sa anumang kasong ipinahayag ng OWWA; at ang maghahatid ng tulong sa mga anak ng OFWs in the Family Development Sessions (FDs) at Parenting Effectiveness Sessions (PES).

Ipinahayag ni Bello na ang MOU ay nakaayon sa Republic Act No. 7610, o ang “An Act Providing Stronger Deterrence and Special Protection Against Child Abuse, Exploitation and Discrimination”, at sa Republic Act No. 9262, o ang “An Act on Violence Against Women and their Children” (VAWC).

###celestemaring/ADV

Like
Like Love Haha Wow Sad Angry