Matapos ang pagsasaayos ng mga pangunahing serbisyo, patuloy ding pinagbubuti ng Department of Labor and Employment ang feedback reporting para sa mataas na kalidad ng ibinibigay na serbisyo sa publiko.

Inatasan ni Labor and Employment Secretary Silvestre H. Bello III ang lahat ng Bureaus, Services, Attached Agencies (AAs), Regional Offices (ROs), at Philippine Overseas Labor Offices (POLOs) na nasa ilalim ng kanyang pangangasiwa, na ipatupad ang bagong reporting system para sa dokumentasyon ng feedback system, para sa mas maayos na paghahatid ng pangunahing serbisyo.

“Ang pagpapatupad ng bagong reporting system ay bahagi ng pagpupunyagi ng DOLE na makapagbigay ng maayos na serbisyo,” ani Bello.

Kanyang idinagdag na sa bagong reporting system, ang compliance report ng mga panguhaning serbisyo ay ipoproseso ng kinauukulang focal monitoring office ng DOLE.

Kabilang sa focal monitoring office na mangangasiwa at magsusuri sa compliance report ay ang Internal Audit Service (IAS) para sa 72-hour PCT sa paghahatid ng serbisyo; Human Resource Development Service (HRDS) para sa Hotline 8888 at CSC Contact Center ng Bayan, at ang mga reklamo na natanggap sa pamamagitan ng liham; at ang Financial and Management Service (FMS) para sa Anti-Red Tape Act (ARTA).

Kasama rin ang Information and Publication Service (IPS), sa pakikapagtulungan ng ROs, AAs, at POLOs, para sa 24/7 Hotline 1349; at Regional, Attached Agencies at POLOs para sa kanilang Hotlines; at Philippine Overseas Employment Administration (POEA) para sa One Stop Service Center for OFWs (OSSCO).

“Para matiyak ang epektibong pagpapatupad ng bagong reporting system, kinakailangang magtalaga ng kani-kanilang focal person at alternate ang lahat ng kinauukulang tanggapan sa kanilang mga frontline services,” ani ng kalihim.

Maliban sa pagsasaayos ng pangunahing serbisyo at patakaran, ang ilan pang reporma sa pagsasa-ayos ng paghahatid ng serbisyo ay ang pagbabawas ng process cycle time ng 25 hanggang 72 porsiyento; at ang pagpapatupad ng strategic feedback system upang makalap ang saloobin ng mga kliyente sa 72-oras frontline service ng Kagawaran.

“Patuloy kaming magpapatupad ng mekanismo na naglalayong itaas ang kalidad ng paghahatid ng serbisyo ayon na rin sa direktiba ng Presidente na wakasan ang red tape at tapusin sa loob ng 72-oras ang transaksiyon sa pamahalaan,” dagdag niya.

END/Tim Laderas/GMEArce

Like
Like Love Haha Wow Sad Angry